Pasa den urrian, Portugaleko Errepublikako presidente Aníbal Cavaco Silvak ur zurrustaren teknologia erabiltzen duten CNC makinen fabrikatzailea den CEI enpresa bisitatu zuen. Fabrikazio lerro estandarraz gain, CEI enpresak makina bereziak ere fabrikatzen ditu, eta oraingoan 5 ardatzeko makina bat garatu du CNC 8065-arekin, Portugaleko Fagorrekin elkarlanean arituta. Makinak material konposatuak 3800 bar-eko presioko ur zurrusta batez mozten ditu, ibilgailu motordunetarako kaskoetan akaberak egiteko.
Proiektua egiteko, langileari lan guztietan lagundu eta babestu egingo dioten hainbat funtzio inplementatu ziren, besteak beste, hauek: RTCP funtzioak, plano inklinatuen definizioa, ardatz birtuala, aitzinamendurako bolantea ibilbidean atzera eginez, lana eten den azken puntuaren bilaketa ardatz birtualean doikuntzak egiteko, eta pertsonalizazioak barra kodeen irakurgailuaren laguntzarekin.
Makinak gantry arkitektura dauka, 2 ardatz birakarirekin erremintan eta 4 palet dituen mahai birakari batekin; FAGORek garatutako CNC 8065aren ardatz birtualaren sistema erabiltzen du, erremintaren eta ebaketa azalera irregularraren arteko tartea doitzeko. Ardatz birtualaren prestazioari esker langileak azkar doitu dezake ebaketaren ibilbidea, CAMen laguntzarik gabe eta ondoren, beste doikuntzaren bat eginez gero, programa berri baten tratamendua behar izan gabe.
Horrela, CAMak kaskoaren azalera konplexuaren gainean ebakitzean egiten den ibilbidearen kalkulu teorikoa egingo du, ur zurrustaren ukipen puntua baino ez kontuan hartuta, eta ondoren, ebaketa puntaren eta piezaren arteko tartea doituta, hainbat faktoreren arabera, bereziki erremintaren neurria eta piezaren mugapenak, ebaketa ahalik eta eraginkorrena izan dadin. Mugapen horietako asko langileak antzematen ditu, eta, ondorioz, makinan doitzen dira modu errazean eta azkar.
Mekanizatu beharreko piezen diseinu teknikoaren konplexutasun handia dela eta, plano inklinatuaren definizioa ere erabiltzen da etengabe. Horrek errotazioan zuzenketak egitea ahalbidetzen du programa osoan, piezaren jatorri puntuaren doikuntza fina egiteko eta ibilbideak leku zehatzetatik igaro daitezen.
Makina bezeroaren fabrikazio prozesura hobeto moldatzeko, barra kodeen irakurgailu bat eta pertsonalizazioak gehitu zitzaizkion, langileak mekanizatu beharreko kaskoaren modeloa ondo aukeratu dezan, akatsik egin gabe, izan ere, modeloak etengabe pertsonalizatzen ari direnez eta erabilgarri dagoen katalogoa hain handia denez, gerta daiteke egun berean modelo bat baino gehiago mekanizatu behar izatea eta, beraz, langileak akatsak egiteko arriskua handia izan daiteke.
Fagorren CNC 8065-ak duen puntako teknologiari esker, proiektuaren zailtasun guztiak gainditu ahal izan dira, bereziki azpimarratuta ardatz birtualaren erabilera, izan ere, horri esker eta Fagorren CNCek programaziorako eskaintzen duten malgutasunari eta erraztasunari esker, posible izan da hasieran proiektuak ematea espero ziren emaitzarik hoberenak ere gainditzea.
